jueves, 28 de septiembre de 2017

Como un reló


(Pa David Roces, el mui cuco, que tamién anda como un reló)

     Na sala espera l’ambulatoriu’l paisanu mírame. Toi fuchicando pel móvil. Llevanto un poco los güeyos. Aprovecha’l cruce de miraes.
     -Lo de la tecnoloxía y los cacharrinos estos ye la de Dios, compañeru.
     Y señala pal reló: negru y allargáu, encaxetáu nuna goma silicona, fundiéndose na moñeca peluda.
     -Regalómelu la muyer esti día. Dizte de too. Púnxome’l guah.e una aplicación nel móvil y cántalo too. Mira, ¿ves? –rabila pel cacharrín que desapaez embaxo’l so índiz de barrenista. Na pantalla camuden los díxitos- Dizte la hora; dizte los pasos qu’andes…
     El paisanu llevántase y trasiega’l pasiellu a ritmu lexonariu pa demostrámelo … De dos mil pasos cálcase en dosmil cincuenta y tres nun santiamén.
     -Tradúztelo a kilómetros , y aparte, dizte les pulsaciones, que por eso vengo yo agora, que dame qu’ando descompensáu, mira…
     La pantalla zumba y enséñame les pulsaciones.

     -Y lo meyor ye que te diz hasta cómo duermes. Y réñete. Como quedes viendo una película…       Buena recatafila te cae. Ye como tener a la muyer, pero en dixital. Mira…
     El paisanu enséñame nel móvil una retafila gráfiques que miro con cara d’entendíu…
     -Y aparte, date enseñes. Tienes que compromete a caminar ciertu número de pasos tolos díes, y vas xubiendo… De los que paramos en chigre namás hai ún que me supera. Yo llevo yá dos meses y picu con ocho mil pasos tolos díes. Si ta feo fuera, camino per casa y doi vueltes a la salita y la muyer dime: Costan, home, apara un poco, que me pones nerviosa, y yo, calla, Marisina, que nun llego coime, que me queden mil pasos…
     Dende que tien el reló, diz el paisanu qu’anda como un reló.
     Tien tanta fe nel reló que va salvase: como muerra un día y nun lu avisen pel cacharrín, va siguir tan ufanu ensin decatase de que ta muertu.

     -Home - chísgame un güeyu-, voi dicítelo en confianza: namás lu quito cuando voi al chigre, y métolu en bolsu. Nun vaya ser que se chive tamién d’ello…