miércoles, 5 de julio de 2017

Fiesta de prau

De mano la fiesta nació como quien nun quier la cosa: unes tortielles enriba unos tableros, la bebida a enfriar nel regueru y perres a escote pa pagar al del curdión pol aquello de char unes pieces, unos valsiaos. Tan buen tastu dexó na memoria que se ruxía en ca alcuentru de vecinos, tanto que pal añu viniente escacipló'l cura más que poles mises de les ánimes de los difuntos, por mete-y diente de papu a les tortielles de chorizu y prebar del vinu de pelleyu. Por sacar pa caridá, puyóse'l ramu y, como yeren más a escotar, hubo gaita, tambor, curdión y fotógrafu ambulante que xubió nel furgonetu de los xelaos, que yera branu, facía sol, montaran chocolatada pa la reciella y había negociu. Un par de paisanos industriosos (d'esos qu'agora llamaríemos emprendedores) constituyéronse en comisión de fiestes, reclutaron socios (los mesmos que participaben nel escote) y traxeron una charanga. Pasó un añu un vecín que yera secretariu d'un viceconseyeru, echó unes palabruques y convirtióse nel pregoneru, porque contaba chistes como Dios. Depués la orquesta, les rifes, la llotería de Navidá (que dacuando tocaba la pedrea o lo xugao), los papeles pa la subvención del ayuntamientu (que total, pa lo que daben y nada), les semeyes del porfoliu. El segundu día. Un terceru, que nun hai dos ensin tres. Y la xira. La barra subastada. Nun revolvía del formigueru xente. Una segunda barra. Cacharros a mamplén. Protección civil. La SGAE. El coche patrulla a la vuelta mandando asoplar. Y les orquestes. Los paisanos enllenos d'arguyu porque hasta la prensa rexonal aporta pa ver cómo dende la mañana revuelven les orquestes gallegues pa meter aquellos trailers nel prau de la fiesta, que nin camión d’Ensidesa nin Dúmper del cielu abiertu de tamaña condición y tamañu, pasaren pel pueblu. Dende pela mañana los más vieyos saquen el vermú a la terraza y acolumbren les maniobres infinites pa llibrar esquines y pegollos. Amiren l'espectáculu, partíu'l bollu de chorizu con tocín y la botella vinu abierta.
Aguarden, esperanzaos con que un día'l camión nun revuelva, tenga que marchar y les manaes de xente que-yos rompen les macetes, patien el prau, mexen y caguen portielles y s'engarren a la mínima, se suman col camión que da la vuelta.
Suañen, los güeyos afondaos nel recuerdu, con sentir unes pieces al curdión -qu'esta música moderna de pachunda dunda nun hai quien lo siga. Suañen con recuperar la fiesta que facíen pa ellos y que, nun acierten a saber cuándo, en qué momentu, perdieron.