miércoles, 28 de mayo de 2014

Cultura


Una vegada, de nenu, a les ocho y media de la tarde d’un vienres de xunetu nun quedó un ren na cai nel mio pueblu: corriérase la voz de que nel tramu d’anuncios d’enantes del parte diba salir una moza de L’Entregu pela tele, nun anunciu d’un refrescu de naranxa… Tol mundu corrió pa en casa con esa curiosidá paletuca de ver a un conocíu asomando pel ventanu en blanco y prieto o a color del telefunken.
Mio güela vivía nun terceru (más planta baxa, lo que lu convertía nun cuartu) y yo, cafiante, tarrecía subir les escaleres pa ver a una moza que nin conocía y cola que nun cruzara nin una pallabra, asina que quedé na cai que tenía un aquel de película de mieu.
Dalgo d’ello pámique sucedió colos proyectos culturales que s’entamaron nesti país. Sí, yá sabéis.
Prestábanos ser grandonos y poner una piquina nuestra el mapa mundial intergalácticu: ¡qué tiempos aquellos cuando teníemos de xefe d’obra a Brad Pitt o venía a tocar la charanga de Woody Allen! Nun veíemos, claro ta, la factura. Y si la víemos, qué más daba. Sedrá por perres. Porque prestaba. Prestaba que cuando les teles nacionales sacaben aquelles estrelles que veníen a facer les provincies dalgún conocíu facía’l magüetu sacando’l focicu per detrás y llamando a casa pa decir, “pon la tele que salgo”. Prestába-yos a los nuestros gobernantes más qu’a un tontu un carambelu tar en primera fila, quien sabe si pasar a los fíos al camerín pa que vieren, tocaren a la estrella de turnu, y dicir, “¡qué grande ye esti puntu! Diome un par de besos y firmó autógrafos…
Eso yera’l so proyectu de cultura. Y duró lo que duraron les perres, claro ta. Porque esta traza de cultura nun tien otru secretu que’l golpe de chequera. Sí: demientres la ruina de la colexata de Salas, demientres los castros tán ensin escavar, demientres el país pierde los nicios d’identidá, y se niega la llingua propio, ¡¡qué guapo foi sentinos arropaos pol glamour y la vie en rose!!
Por embargu, la cultura nun se costrúi a base de chequera: en L’Entregu La Semiente, por exemplu, verdadera cultura, de la que llega al pueblu, de la que costrúi pueblu, con ganes y pasando la gorra  (¡¡fenomenal la foguera, les timbes y l'amagüestu!!); en ca pueblu, el centru social onde aconceyen a pintar, facer manualidaes, esposiciones, charres de micoloxía tien más sentíu que les semeyes turístiques d’una actriz vistiendo unes muries kilométriques…
Por eso nun dexa de chocame qu’al empar que se marafundien millones d’euros en caltener equipamientos culturales vacíos y desproporcionaos y tan fuera d’escala, s’emperren  en trancar equipamientos culturales que sedimenten y nutren culturalmente a la xente, como ye’l casu de La Madreña uvieína.
Quiciabes esa nun ye la cultura que quieren. Quiciabes, nesa cultura, más barata, más eficaz, nun puedan sentise importantes y grandones, cosmopaletinos universales.
Aquel día de la mio infancia, al paecer, naide vio a la rapaza aquella pela tele más que de refilón y con dubies.
Como esti país, nun yera protagonista, namás un figurante.

lunes, 26 de mayo de 2014

La presentación d'Oneta

Tatuaxes nel corazón
Marisa López Diz
(con ilustraciones de Ruma Barbero)
VI Premiu María Josefa Canellada de Lliteratura Infantil y Juvenil
Impronta, Xixón, 2014

Oneta, una moza xixonesa de quince años, gana'l derechu a facese un tatuax, pero nun sabe nin qué va escoyer nin en qué parte del cuerpu tatualo. Y nun ye d'estrañar. Porque del tiempu d'Oneta nada paez ser tan duradero como resulta un tatuaxe. Les coses más sólides (el primer amor, el matrimoniu de los sos pas) esfarraplaron y ello fae qu'Oneta tea esquiva y que nun se fíe un migayu de nada nin de naide. Por eso a Oneta-y presten tanto los númberos y les matemátiques: ellos son fixos, sabes a qué atenete, pues fiate d'ellos, nunca nun mienten, nun son como les pallabres.
      Sicasí, bien llueu Oneta, que quier da-y otra oportunidá a la vida, va descubrir que nun hai tatuaxe más duraderu qu'aquel que l'amor fae nel corazón.
     Marisa López Diz (Xixón, 1970) vien de recibir con esta novela'l VI Premiu María Josefa Canellada de Lliteratura Infantil y Juvenil. Lo que más sosprende ye la fresca utilización del llinguaxe de la mocedá na novela; y nun me refiero namás a la manera d'espresase, nun estilu directu, llanu, con abondoses referencies a la cultura de mases ya incorporando otros idiomes (l'inglés de los cantares, el xaponés del manga); nun me refiero a que Marisa llogre qu'en sintiendo al so personaxe, Oneta, teamos sintiendo falar a una d'eses rapacines que caleyen per Xixón colos cascos, el piercing, el furón (esi Sable que tan poco sal na novela)...
Marisa López Diz
     Non: Marisa López Diz tien l'aciertu d'incorporar a la so novela toa una riestra d'elementos visuales que van dende la ilustración tradicional (toes elles feches por Ruma Barbero) a los modernos emoticones; xuega tamién col tamañu del tipu de lletra y color del mesmu pa da-y realce y espresividá a lo que quier dicir y establez distintos niveles y tipos d'escritura (post-it, notes, mensaxes de móvil y de wuasap...) que faen que'l llibru resulte amenu, de llectura rápida y atractivu pa la xente mozo.
     Nesi sen, esti volume dase un aire a les principales novedaes que suelen amontonase nes meses de les llibreríes y que les editoriales encamienten pa la xente moz
o (tres de sesudos estudios de marketing): llibros nos que la historia se cuente al tresviés de les munches posibilidaes visuales qu'ufierta la illustración y el grafismu, y nun solo enfotándose na edición tradicional que conceptúa la narración de la obra al tresviés de la pallabra escrito.
     Sicasí, Tatuaxes nel corazón tien una traba: la so brevedá. Marisa López Diz fae que nos encariñemos con Oneta, que simpaticemos coles sos ocurrencies y critiques; munches de les coses que-y ocurrieron queden namás sopuntiaes (como lo que-y pasó con Lolo) y déxanos col miel nos llabios al final. Ye dicir: Marisa López Diz preséntanos al personaxe, Oneta y una historia pequeñina de so. El llector tarrez llegar al final y despidise d'Oneta, de los mensaxes cruzaos coles amigues, dicir adiós a esa relación peculiar cola ma, de cariñu, de proteición, d'aborrecese alcuando... Y lo que nun abandona al llector ye esa sensación d'acabar xusto cuando meyor lo taba pasando.
     Cruzo los deos y espero que, como les novedaes editoriales de les meses de les llibreríes, también Marisa López Diz tea contemplando sacar, en breve, la segunda parte.